الشركات الناشئة في مجال الخدمات VS المنتجات

لما تقرر تبدأ تأسيس شركتك، ويبقى عندك مشروعك الخاص، هتحس فجأة إن الموضوع كبير جدا ومخيف: اسم الشركة.. السوق.. العملاء.. الحسابات.. الموظفين.. إلخ، وهيجي في بالك ألف سبب وسبب ممكن يخلوا الشركة تفشل.

بس زي مافيه "رمز الغش" في ألعاب الفيديو جيم، في رمز غش برضه للشركات الناشئة.

رمز الغش للي ما يعرفهوش هو عبارة عن طريقة أو جهاز بيساعدك وإنت بتلعبك أي جيم عشان تعدي مستويات كتيرة بسرعة، أو تاخد مزايا زيادة في اللعبة، فتقدر في الآخر تكسب الجيم، في حين إلي مش بيستخدمه بتزيد نسبة فشله وخسارته في اللعب.

كتاب "دليل ميداني صادق إلى عالم الشركات الناشئة" بيركز بشكل أساسي على "رمز الغش" ال خاص بالشركات الناشئة، يعني الكتاب بيوفر عليك إنك تجرب بنفسك تأسس شركة وتفشل وتعيد المحاولة تاني وتالت لحد ماتنجح.

وده لأن الكتاب إلي ألفه خبير التسويق الأمريكي راند فيشكن بيديلك خلاصة تجارب كتير أدت لفشل أصحابها في النجاح في تأسيس شركاتهم واستمرارها في السوق، يعني الكتاب بيقدم خريطة بتوضحلك إيه المشاكل إلي ممكن تواجهها، وبيقولك تحلها أو تتجنبها إزاي.

راند فيشكن أمريكي اتولد 10 يوليو 1979، وعاش مع أهله وإخواته في ولاية سياتل الأمريكية، بدأ دراسته الجامعية في جامعة واشنطن بنفس الولاية، واتخصص في المجال المالي في كلية الأعمال.

بيعتبر فيشكن من أشهر مبدعي التسويق في العالم، بالإضافة لكونه مستشار التسويق لشركة أنبونس "Unbounce" للحلول التسويقية، وشارك برضه في تأسيس شركة "Moz سنة 2002، وكان هو الرئيس التنفيذي ليها.