في الفترة الاخيرة جتلنا أسئلة كتير جداً شكلها يبدو مختلف لكن مضمونها واحد وهو "كيف ابدأ مشروع"

والأسئلة تنوعت بين انا عندي فكرة بس مش عارف انفذها إزاي؟َ!.. انا نفسي اعمل مشروع بس مش عارف إيه هو؟.. انا معايا مبلغ بس ايه اكتر مشروع مربح ممكن أعمله؟

لأن الإجابة أعمق من بوست فيسبوك هنحاول نعمل مجموعة من البوستات لشرح الفكرة بشكل وافى.

في دراسة بتقول إن 80% من المشاريع الجديدة بتتقفل في خلال السنة و نص الاولى و20% بس هما اللي بيكملوا ولازم نعرف ان نجاح اي مشروع في الدنيا مرتبط بمجموعة من العوامل علشان نضمن نجاحه ومحتاج يكون عندك صبر وعزيمة وطولة بال لإن أى مشروع في الدنيا ممكن يمر بمرحلة فشل في البداية بس المهم انك تحول الفشل دة لنجاح فتعالى نشوف مع بعض إيه هي العناصر اللي مفروض يمر بيها أي مشروع عشان ينجح.

خطوات اعداد المشروع

المرحلة الأولى: تحديد فكرة المشروع

أولاَ وقبل أي حاجة مهم قوي لو جت في بالك فكرة اى مشروع حاول تسأل نفسك سؤال مهم هل أنا عندي خبرة كافية في المشروع ده ولّا هعمل مشروع فكرته عجباني و زي ما تيجي تيجي؟! لو كانت إجابتك اه يبقى انت كده حددت الفكرة ووفرت على نفسك مجهود كبير و اسئلة كتير جداً و لو كانت إجابتك لا يبقى وحابب تعمل فكرة مشروع جديدة أو مش مهروسة، حاول تجمع معلومات كتيرة عن أي مشروع فكرته قريبه لفكرتك و تسأل و تاخد خبرة الناس اللي اشتغلت فيه و متزهقش من السؤال و فكر انك إزاي تقدمها بشكل كويس و تخلق ليها سوق وميزة تنافسية و تسأل اصحابك و قرايبك و تعرف آرائهم و ردود أفعالهم عشان كل ده هيفيدك و يطور فكرتك و حاول انك تستفيد من قصص النجاح الخاصة برواد الأعمال اللي موجودة على الانترنت.

المرحلة الثانية: هل فكرة المشروع جديدة ولا موجودة
لو هتعمل فكرة موجودة بس عايز تعملها عشان انت عندك خبره فيها او حاببها بشكل كبير و نفسك يكون ليك كيان في الحاجه دي يبقى حاول انك تتميز فيها على غيرك و تعمل خدمة موجودة عندك بس مش موجودة عند غيرك وده اللى بنسميه (الميزة التنافسية).

قصة نجاح لـ "نيك سوينمورن" كيف بداء مشروع من الصفر.

القصة بدأت سنة 1999 لما "نيك سوينمورن" نزل في مرة عشان يشتري جزمة وفضل يلف على المحلات و كل ما يدخل محل مايلاقيش المقاس بتاعة و لو لقى المقاس مش بيلاقي اللون!! زهق "سوينمورن" و قرر إنه يروّح و يدوّر على الانترنت بس اتفاجئ لما ملقاش إلا عدد قليل جدا من المواقع الالكترونية المتخصصة في بيع الجزم و كمان ملقاش موديلات كتير فقرر ساعتها إنه يقتحم سوق التجارة الإلكترونية مشاركتاً مع صديقة "توني شاي" و أسسوا موقع إلكتروني متخصص في بيع الاحذية و كان اسمه "شوز سايت" بعد كدة اتغير ل"زابوس" و القصة دي بتعرفنا قد ايه "سوينمورن" قدر إنه يستغل إحتياج السوق و يحوله لنجاح.

الخلاصة.. الأفكار مهمة جداُ لأي مشروع و لو عايز تنجح لازم تختار فكرة مناسبة وتطرحها في الوقت المناسب و الاهم من النجاح إنك تستمر فيه بإنك تقدم خدمات متميزة مش عند حد غيرك.