لو حابب تزود دخلك وانت مرتاح وقاعد في بيتك فالتسويق بالعمولة أنسب حاجة ممكن تعملها دلوقتي، مش هتحتاج أكتر من جهاز كمبيوتر وإمكانية الدخول على الإنترنت وتقدر من هنا تبدأ وتنطلق، بس تعالى الأول نعرف إيه هو التسويق بالعمولة وبدأ ازاي؟

ظهور الإنترنت ومحركات البحث فتح مجال واسع أوي للتجارة الالكترونية، فالمواقع بدأت أنها تخلق محتوى مفيد وتقدم مميزات كبيرة جدا للزوار بتوعها وفي نفس الوقت كانوا عايزين يكسبوا، فبدأوا يستخدموا أساليب ووسائل كتير للإعلانات والتسويق لحد ما ظهر مفهوم التسويق بالعمولة واللي هو بمنتهى البساطة بيعتمد على أنك بتكون مسوق لمنتجات موقع معين من خلال توجيهك للمشترين المحتملين إنهم يشتروا منتج معين عن طريق رابط خاص بيك وفي المقابل بتحصل على عمولة من البائع.

التسويق بالعمولةaffiliate أنتشر صداه في العالم بعد ما استخدمه موقع أمازون سنة 1996 وكان النموذج بتاعهم بيعتمد على إنهم بيدفعوا عمولة كنسبة مئوية للمنتج اللي بيتم بيعه والنموذج ده هو الأكثر انتشارا دلوقتي، الحقيقة إن أمازون مكنش أول حد يبتكر برامج التسويق بالعمولة ولكن الفضل بيرجع ل “ويليام توبين" واللي بيعتبر أول شخص يستخدم التسويق بالعمولة سنة 1989 ووصل إنه حقق أرباح وصلت لحوالي 6 مليون دولار سنة 1993.

تبدأ ازاي؟ كل اللي عليك إنك أما تدور على شركات ومواقع يكون عندها برامج تسويق بالعمولة ممكن إنك تشترك فيها وفي مواقع عربية كتير بتستخدم البرنامج ده منها موقع أكاديمية إعمل بيزنس، جوميا، سوق دوت كوم، موقع جملون، ومواقع تانية كتير، أو إنك تنضم لشبكات تسويق بالعمولة ودي بتبقى وسيط بينك كمسوق وبين الموقع وغالبا الانضمام للشبكات دي بيبقى أصعب لأنها بتحتاج أن يكون عندك خبرة في مجال التسويق الالكتروني ومن أمثلتها عربي آدز، وشبكة حسوب.

طيب دلوقتي انت اشتركت في الموقع خلاص وحددت المنتج اللي هتحاول تسوقه، نيجي للنقطة المهمة إزاي تبدأ عملية تسويقك للمنتج بطريقة تجذب بيها المشتريين المحتملين، أولا لازم تبقى عارف إن في طرق للتسويق مجانية وفي طرق تانية مدفوعة وانت لازم تحدد انت هتختار أنهي طريقة تبدأ بيها وتكون الأفضل بالنسبالك.

طب تعالى نعرف إيه هي الطرق المجانية اللي ممكن تساعدك في إنك توصل بيها للعملاء المحتملين:

• إنك تكتب مراجعات في مواقع مجانية تشرح فيها تجربتك الشخصية للمنتج بس خد بالك إنك لازم تكون صادق ومش منحاز حتى لو كان المنتج فيه خلل طفيف، بس دايما حافظ على مصداقيتك ومتضحيش بيها.

• شبكات التواصل الاجتماعي زي فيسبوك وتويتر من خلال إنك تعمل صفحة تجارية أو جروب تستخدمه كمنصة تشرح المنتج وتروج له والطريقة دي عشان تعرف تستخدمها لازم تعرف إزاي تدير الصفحات دي بفاعلية وتزود المهتمين بالمنتج اللي بتروج له.

• القيام بفيديوهات ترويجية على اليوتيوب مثلا عن المنتج تشرح فيه مميزاته وكل اللي هتحتاجه عشان تقنع المشتري وفي آخر الفيديو تحط لينك المنتج عالموقع اللي هيقدر يدخل يشتريه منه.

• المنتديات اللى ممكن تكون بتتناول موضوع مناسب للمنتج اللي بتسوقه فممكن تنشر تقييمك والدعاية لمنتجك هناك، وتستغلها برده في نشر روابط لمنتج الخاصة بيك.

• التسويق من خلال القوائم البريدية فلو كان عندك قائمة بريدية ممكن ترسل لهم بريد يعرض منتجك ويوضح مزاياه وتضيف فالميل رابط المنتج الخاص بيك.

في كمان طرق مدفوعة ممكن تستخدمها عشان تروج للمنتج اللي بتسوقه ومن خلالها تقدر توصل لعملاء أكبر:

• شبكات التواصل الاجتماعي زي فيس بوك ولينكد إن بتسمح إنك تعمل إعلانات ممولة توصل بيها للشريحة اللي بيستهدفها المنتج اللي بتسوق له.

• شبكات الإعلانات عن طريق عمل إعلانات ممولة في شبكات زيGoogle Adswords وغيرها.

وفي مجموعة أخطاء شائعة بيقع فيها كتير من اللي بيبدأوا في برامج التسويق بالعمولة ولازم تاخد بالك منها زي:

• الميزانية: التسويق بالعمولة ممكن يحتاج تجهيز مبلغ مالي كاستثمار مبدئي عشان توصل لعائد جيد بسرعة لأن الاعتماد بس على الطرق المجانية بيحتاج وقت طويل وجهد أكبر والمبلغ ده هيختلف حسب الطريقة اللي هتستخدمها والعملاء المحتملين.

• تسويق منتجات ذات هامش ربح كبير: معظم المبتدئين بيختاروا المنتجات اللي تسويقها هيوفر عمولة كبيرة من غير ما يكون مقتنع بيها، بس ممكن يكون الترويج لمنتج هامش ربحه أقل أفضل لأن هيكون سهل تسويقه والحملات الممولة اللي هتقوم بيها سعرها هيكون أقل وغالبا المنتجات دي بيقبل عليها الناس بشكل أكبر بكتير.

• التسويق لمنتجات ذات جودة سيئة: لازم قبل ما تسوق أي منتج تجربه بنفسه، فعدم التجربة ده خطأ هيوقعك في خطأ أكبر لإن اقتراحك منتج سيئ لمتابعيك ده هيعتبروه كأنك بتقولهم ارمي فلوسكم في البحر، وبالتالي الناس هتلغي متابعتها ليك ومبيعات المنتج اللي بتسوقه هتقل والأهم إنك هتفقد مصداقيتك.

• غياب التعقب: لازم تعرف كل مكان نشرت فيه رابط المنتج بتاعك جابلك عملاء قد ايه ومصدر مبيعاتك كانت من انهي طريقة استخدمتها، لأنك لو شغال بكذا طريقة للتسويق في نفس الوقت، ممكن يؤدي لأن يكون في طرق استخدمتها ومحققتش أي نتائج وده معناه إنك بتضيع وقتك ومجهودك وانت مش عارف.

• التشتت: من خلال اشتراكك في كتير من برامج التسويق بالعمولة بالمواقع المختلفة وده ممكن يكون عامل من عوامل التشتت لان هتلاقي نفسك بدون خطة واضحة ولا مبيعات ولا تركيز على منتج معين وفي الأخير صفر أرباح في كل سجلات الايرادات التي بتقدمهالك البرامج دي.

التسويق بالعمولة ممكن يوفرلك مميزات كتير، هتقدر توفر من وقتك وجهدك كتير فمش هتحتاج أن يكون عندك منتَج خاص عشان تعمل أرباح عن طريق الإنترنت، هتقدر تدير وقتك زي مانت عايز ومحدش هيشرف على أوقات عملك أو يتدخل فيها، ده غير ان الموضوع كله مش مكلف لأنك عندك منتج جاهز متحملتش أي تكلفة في صنعه وتجهيزه وتقريبا مفيش أي مخاطرة هتدخل نفسك فيها، وأخيرا هتحقق أرباح في وقت أقل بكتير من أي استثمار تاني ممكن تدخل فيه، وفي النهاية دايما زي ما بنقول في أي بوست لينا متبدأش أي بيزنس الا لما تدرسه وتفهمه الأول من كل جوانبه.