من الأخبار اللي أثارت حواليها علامات استفهام كتير الفترة اللي فاتت هو خبر تغيير أسم البراند الأمريكي "دانكن دونتس" إلى دنكن بس، واللي بدوره أثار تساؤلات كتير بين جمهور العملاء عن السبب ورا الخطوة دي، لحد ما خرج تعليق من إدارة سلسلة مطاعم دانكن اللي وضح فيه أن الدونتس لسه موجودة في المنيو وأن الشركة بتعيد التسمية عشان تعكس تركيزها على تقديم القهوة والمشروبات التانيه اللي مبتلاقيش رواج كبير زي الدونتس.

تغيير اسم البراند هيحصل بشكل كلي في يناير 2019 وهيتم تغيير واجهة 12,500 فرع في العالم، وده مع العلم أن أسم البراند الجديد هيحافظ على نفس هوية الشعار القديم من حيث الألوان اللي بيتم استخدامها من سنة 1948 وهي البرتقاني والروز.

وفي تصريح تاني لإدارة دانكن بيقولوا فيه أن تغيير أسم البراند هو واحد من الأشياء العديدة اللي الشركة هتقوم بيها عشان تحافظ على تواصلها مع الزبائن الأصغر سناً وأن الشركة كمان هتركز على أنها تبسط المنيو الخاص بيها عشان يناسب الشريحة المستهدفة الجديدة بالإضافة إلى توفير موبايل ابليكشن يقدر العميل أنه يطلب من خلاله.

لو جينا بقى بصينا للأسباب اللي ذكرناها دي وهل هي فعلاً تستاهل أن الشركة تغيير أسم البراند عشانها هنلاقي الإجابة موجودة في تصريح الرئيس التنفيذي لشركة دانكن براندز ديفيد هوفمان اللي قال فيه ان تغيير أسم البراند ده ليه سببين رئيسين وهما زيادة التركيز على المشروبات والقهوة لأن الاتجاه العام لدى العديد من المستهلكين الأمريكان أصبح التوجه للمأكولات والمشروبات الصحية، ده غير أن هامش ربح المشروبات والبن أعلى من الدونتس وأن عشان يزودوا مبيعات المشروبات هتقوم الشركة كمان بتوفير ماكينات لتحضير المشروبات السخنة بشكل سريع في كل فروعها.

والسبب الثاني اللي دفع الشركة لتغيير أسم البراند ده حسب تصريح توني وايزمان مدير قطاع التسويق بالشركة أنه الشركة بتتجه لتبسيط العلامة التجارية ككل لزيادة التواصل والارتباط مع العملاء حيث أن دانكن هو نسخة أقصر وأبسط وأكثر حداثة عن دانكن دونتس.

نيجي بقى للدروس المستفادة من تغيير أسم البراند:

- التطوير شيء لا مفر منه:

مهما كان وضعك مستقر في السوق لازم تبص ديماً للمستقبل وتبص للتهديدات اللي ممكن تواجهها والفرص اللي ممكن تقتنصها، فعلى الرغم من تواجد دانكن في السوق من أكتر من 70 سنة وارتباطه الشديد بالعملاء إلا أن الشركة قررت تغير أسم البراند واسلوبها لما حست أن العملاء سلوكهم الشرائي اتغير واصبح ليهم اتجاه للمأكولات والمشروبات الصحية ده غير التطور الكبير اللي حصل في عالم القهوة بعد ازدياد الطلب العالمي عليها ودخول منافسين جدد زي كوكاكولا.

- التغيير بيتم على مراحل:

يوم ما تاخد قرار التغيير للشعار أو لأسم البراند بتاعك لازم يكون التغيير ده على مراحل وما يتمش مره واحده وده اللي شفناه مع دانكن اللي بدأت في التغيير ده وتجربته مع نهاية 2017 لما تم تغيير أسامي عدد من الفروع في مدينة باسدينا في ولاية كاليفورنيا ثم بدأت الشركة بالتوسع في التغيير ده والوصول ل30 فرع في ولاية بوسطن لحد ما يتم التغيير ده بشكل كلي في يناير 2019.

- التغيير لازم يكون ليه سبب منطقي:

التغير لإسم البراند أو شكله بيعتبر من الخطوات المهمة والخطيرة اللي ممكن أي شركة تقوم بيها عشان كده لازم قبل اتخاذ القرار لابد أنه يكون في دافع قوي ومفيد على المدى البعيد عشان تغير وإلا هيكون ساعتها تغيير فاشل.

في النهاية الأيام الجايه هتورينا إذا كان القرار ده صح ولا غلط وهل فعلاً من الحكمة أنك بعد السنين دي كلها تغيير اسمك ولا لأ.