FB Instagram Twitter Youtube Linkedin دورة حياة المنتج | أكاديمية اعمل بيزنس
 
الرجوع الى المدونة

دورة حياة المنتج

دورة حياة المنتج

مهم إن أى صاحب بيزنس عنده منتج وناوى يطرحه للبيع لازم إنه يتعرف على دورة حياة المنتج ده عشان يقدر يتعامل معاه فى كل مرحلة واللى فيها بتتغير الأهداف باستمرار .ده غير تغير تكلفة إنتاج المنتج فى كل مرحلة وبداية ظهور منافسين فى مراحل معينة وإختفاؤهم فى مراحل أخرى وكمان صعود نسبة المبيعات وتحقيق الأرباح فى مراحل معينة وهبوطها فى مراحل أخرى .

أول مرحلة هى تقديم المنتج:
وبتعتبر أكتر مرحلة بيتصرف فيها على المنتج الجديد وبتكون مكلفة جدًا وطبعًا حجم السوق بيكون صغير يعنى كمان مبيعات قليلة ده بدون تحقيق أرباح تذكر غير تكلفة بحوث التسويق وتطوير المنتج وإختباراته على المستهلكين وبيكون كمان عدد المنافسين أقل والهدف الرئيسى فى المرحلة دى هى تعريف الجمهور المستهدف بالمنتج .

تانى مرحلة هى مرحلة النمو:
وهنا بيبدأ المنتج يحقق نسبة مبيعات وأرباح بشكل تصاعدى وهنا الشركة أو صاحب البيزنس (صاحب المنتج) بيفكر فى زيادة النسبة دى عن طريق توجيه المزيد من الإستثمارات فى أنشطة التسويق ده غير إن تكلفة الإنتاج بتكون ثابتة بشكل كبير وكمان بيبدأ ظهور منافسين ليه والهدف الرئيسى فى المرحلة دى تحقيق أكبر حصة سوقية .

ثالث مرحلة هى مرحلة النضج:
وفى المرحلة دى المنتج بيكون ثبت رجله فى السوق وبيكون صاحب البيزنس حقق هدفه من طرح المنتج سواء فى المبيعات أو تحقيق الأرباح بنسبة كبيرة ووصل للذروة فى مقابل تكلفة أقل وثبات عدد المنافسين وفى المرحلة دى بيهتم صاحب البيزنس اللى طرح المنتج بتطوير وتحديث المنتج عشان يضيف ميزة تنافسية ليه والهدف الرئيسى فى المرحلة دى تحقيق أكبر نسبة ربح .

رابع مرحلة هى مرحلة الإنحدار:
وهى بداية إنكماش المنتج وهو ما يعرف بمرحلة الإنحدار وممكن يكون سبب إنكماش المنتج هو تشبع السوق بمزيد من المنتجات المشابهة أو لأن المستهلكين بدوأ يتجهوا لمنتج مختلف ولأن الانحدار ده لا مفر منه فممكن صاحب البيزنس يحقق ربح ضئيل عن طريق إستخدام طرق إنتاج أقل تكلفة ويتوجه لأسواق أرخص من سوقه الأصلى المستهدف دع غير إن الهدف الرئيسى فى المرحلة دى هو تقليل الإنفاق لأقصى حدد ممكن .

زى ما شفنا قد إيه أهمية إن كل صاحب بيزنس إنه يفهم دورة حياة منتجه عشان يقدر يحقق ربح ويتواجد فى الصناعة أو المجال اللى بيعمل فيه غير طبعًا المهارة المطلوبة لإدارة المنتج فى كل مرحلة من مراحل حياته وطرق تسويقه ومدى توافق الخطط الإستراتيجية لتسويق المنتج طبقًا لكل مرحلة

شارك المقال :