FB Instagram Twitter Youtube Linkedin قصة نجاح تويوتا – ج1 | أكاديمية اعمل بيزنس
 
الرجوع الى المدونة

قصة نجاح تويوتا – ج1

قصة نجاح تويوتا – ج1

تويوتا .. من صناعة النسيج إلى صناعة السيارات
هنكلم النهاردة عن قصة واحدة من أشهر العلامات التجارية فى مجال صناعة السيارات فى العالم وهى قصة تويوتا اليابانية

بداية شركة تويوتا 
إزاى نشأت وإيه حكاية مؤسسها وإيه اللى وصلها إنها تبقى من أكبر مصنعى السيارات فى العالم .. تعالوا نعرف الحكاية من البداية  
مؤسس شركة "أعمال تويودا للنسيج الآلي " هو ساكيشي تويودا .. اتولد سنة 1867 فى اليابان .. وكان مُلقب بأبو النهضة الصناعية وملك الإختراعات فى اليابان لإختراعاته الكثيرة فى مجال النسيج و مجال السيارات بعد كده وهو واحد من أهم رموز النجاح في اليابان على مر العصور .
ظهر عليه علامات الذكاء من صغره وكان دايمًا عنده شعور بإنه محتاج يقدم حاجة مختلفة للعالم اللى حواليه ففكر فى إختراع آلة يكون اليابانيين محتاجين ليها ومش بس اليابانيين. كمان العالم كله ومحدش يقدر يستغنى عنها فكانت صناعة الملابس .

وفعلاً بدأ مسيرته بتطوير ماكينة خياطة النسيج سنة 1897 وكانت مصنوعة من الخشب ( كان موديل قديم ) عن طريق إضافة بكرات بدل بكرة واحدة بس .. وكانت ليه ابتكارات بسيطة لكنها مؤثرة جداً زى إبتكاره لفكرة إن الماكينة تقف لما يتقطع الخيط عن طريق قطعة حديد .. كان نتيجة الإختراع البسيط ده إنه قدر يوفر عامل واحد لكل 10 ماكينات بدل من عامل لكل ماكينة ده غير إنه أدى إلى زيادة الإنتاج 4 أضعاف وانخفضت التكلفة ل50% .. و أسس في سنة 1918 شركة Toyota للغزل و النسيج .

كان نتيجة الإبتكار ده هو حصوله على مبلغ 100 ألف جنيه استرلينى نتيجة بيعه حقوق براءة الإختراع لأحد ماكينات صناعة النسيج الآلية لشركة بريطانية معروفة ( الأخوين بلات ) وقدمه لإبنه كيشيرو اللى إنضم لفنيين الشركة سنة 1920 وبعد 4 سنين قدر إنه يكمل تطوير أول محرك آلى لحياكة النسيج في اليابان ده غير كمان إن المبلغ ده كان السبب المباشر فى تأسيس شركة تويوتا للسيارات على إيد إبنه كيشيرو .

استغل كيشيرو الإبن مبلغ ال100 ألف جنيه استرلينى فى عمل أبحاث ضرورية لإنتاج أول عربية يابانية وفعلًا سافر كيشيرو لأمريكا وأوروبا لدراسة صناعة السيارات وطبق كيشيرو بشكل صارم القيم اللى اتبنت عليها الشركة واللى شكلت الأساس لفلسفة تويوتا بعد كده واللى وصلها للى هى عليه دلوقتى, وكان ليه الفضل الأكبر فى ابتكار نظام إنتاج تويوتا .

هنكمل فى المقال اللى جاية حكاية تويوتا مع صناعة السيارات وهنشرح فلسفة تويوتا الخاصة والمعروفة ب( نظام إنتاج تويوتا ) وإزاى أصبحت من أهم صناع السيارات فى العالم.