FB Instagram Twitter Youtube Linkedin ليه-البيزنس-محتاج-سفير؟ | أكاديمية اعمل بيزنس
 
الرجوع الى المدونة

ليه-البيزنس-محتاج-سفير؟

ليه-البيزنس-محتاج-سفير؟

ما هو سفير العلامة التجارية أو " Brand Ambassador " ؟

سفير العلامة التجارية هو الشخص اللي بتختاره الشركة عشان يمثل حملتها الاعلانية وبيتم اختياره بناء علي مدي تاثير الشخص ده بالنسبة للمجال اللي شركة بتعلن عنه 

أمثلة علي حملات اعلانية استخدمت فكرة سفير العلامة التجارية:

من الحملات المشهورة اللي اتنفذت في السنين اللي فاتت ونجحت بشكل كبير هي الحملة اللي نظمتها شركة "سبرايت" اللي استعانت فيها بمشاهير كثير زي موزع الموسيقى ساري هاني، وأول مصري يتسلق جبل أفرست عمرو سمره وغيرهم كتير من النماذج الشباب اللي بتعبر عن النشاط والانطلاق، واللي ساعد على نجاح الحملة دي هو أن الأشخاص اللي استعانت بيهم عشان يمثلوا البراند هم اشخاص مشهورين بشكل كبير بين الشريحة المستهدفة في الإعلان ده وهم الشباب.

 

شركة تانيه نجحت بسبب الإستراتيجية دي هي شركة "كونكريت" للملابس اللي بعد ما قامت بتجديد سلسلة محلاتها وتعديل الهوية بتاعتها المتمثلة في اللوجو والألوان وعناصر مرئية تانيه، قامت بإطلاق حملة إعلانية كبيرة أبطالها شخصيات مشهورة زي أسر ياسين وعلى مظهر اللي قدروا أنهم ينقلوا للجمهور طبيعة المنتج اللي الشركة بتقدمه اللي بيميل لكونه منتج فخم وكلاسيكي ومناسب لشريحة معينه، ده غير أمثلة تانية كتير نجحت بسبب النوع ده من التسويق وهو التسويق باستخدام سفراء البراند (brand ambassadors).

 ايه هي شروط استخدام سفير العلامة التجارية:

مبدئياً مش شرط عشان تستخدم النوع ده أنك تستعين بممثلين مشهورين وخلاص بل الأفضل أنك تستعين بالأشخاص المشهورين في المجال اللي انت بتقدم فيه خدماتك زي شركات معجون الأسنان اللي بتستعين بأطباء الأسنان المشهورين، ولو جينا بصينا للأسباب اللي تخليك تستخدم النوع ده من التسويق هتكون كالآتي:

 

- سفراء العلامة التجارية بيضيفوا الطابع الإنساني لعلامتك التجارية: 

العميل بطبيعته بيميل للتفاعل مع الأشخاص والأفراد وبيحب أنه يشوف شخص بيعبر عن المنتج اللي هو هيشتريه، واللي بدوره خلى وجود سفير للعلامة التجارية حاجة أساسية للشركات اللي عايزه تبني ثقة مع عملائها، فعشان كده لازم وانت بتختار سفير للبراند بتاعك تكون ملامح شخصيته متماشية مع طبيعة البراند بتاعك فيمنفعش مثلاً تكون شركة بتقدم منتجات نظافة وتلاقيها جايبه لعيب كوره يمثل البراند بتاعها، بل من الأفضل هنا الاستعانة بممثله تعبر عن الأمهات وربات المنازل.

 

- سفراء العلامة التجارية بيعززوا من تواجدك على منصات التواصل الاجتماعي:

من الطبيعي أنه كل ما يزيد عدد متابعيك على منصات السوشيال ميديا أنه هيزيد عدد مبيعاتك، وده من الحاجات اللي بتميز الاستعانة بسفراء للبراند اللي بيكون عندهم عدد كبير من المتابعين لأنهم بمجرد ما يبدئوا ينشروا صور ليهم وهما بيستخدموا البراند بتاعك بيحصل تأثير ملحوظ على قنوات السوشيال ميديا اللي بتستخدمها فمثلاً لو عندك 3 سفراء للبراند بتاعك وكل واحد فيهم عنده 10 ألاف متابع فانت وصولك هيزيد ليصبح 30 ألف شخص وأكبر دليل على كده هو حجم متابعين شركة أوبر على الفيس بوك قبل وبعد الإعلان الأخير اللي استعانوا فيه بمحمد صلاح.

 

- سفراء العلامة التجارية بيساعدوا على زيادة الوعي بعلامتك التجارية في المناطق اللي انت مش متواجد فيها: 

أكبر دليل على النقطة دي هو استخدام براندات عالمية عند دخولها الأسواق المختلفة للمشاهير الموجودين في البلدان دي زي شركة بيبسي في الهند لما استعانت بأميتاب باتشان في العديد من الحملات الإعلانية ليها وده لأن إدارة التسويق في بيبسي عارفه قدرته على أنه يخلي العملاء اللي ميعرفوش بيبسي أنهم يثقوا في الشركة ويستخدموا منتجاتها.

 

- سفراء العلامة التجارية بيساعدوا على حماية سمعتك:

من الفوايد اللي بتعود عليك من استخدام سفير البراند هو قدرته على الحفاظ على سمعتك من التعليقات السلبية اللي ممكن تصيب منتجاتك على الإنترنت وده بيتم من خلال الصور والفيديوهات والصور اللي بينشروها ليهم وهما بيستخدموا منتجاتك فمثلاً لو براند وجبات سريعة تعرض للانتقاد لأنه بيسبب السمنة فوجود سفير للبراند بيحافظ على لياقته البدنية وبيستخدم المنتج ده كفيل أنه يرد على الاتهامات دي وأكبر دليل على كده هو أنه على الرغم من الاعتراضات الكتير اللي بتتعرضلها المشروبات الغازية بسبب نسبة السكريات العالية الموجودة فيها إلا أنه ناس كتير لسه بتستخدمها وده لأن الشركات دي بتعتمد بشكل كبير على الاستعانة بنماذج رياضية في إعلاناتها.

 

في النهاية مش معنى أن وجود سفير للبراند شيء مهم هو أنه حاجه لازم تطبق في أي شركة، وده لأن الإستراتيجية دي بتكون مناسبة لما يكون المجال اللي انت بتشتغل فيه ليه مجتمع من المتابعين اللي موجود ما بينهم اشخاص مشهورين ومعروفين، فمثلاً ما ينفعش مكتب محاسبه يستعين بممثل عشان يسوق لنفسه، فعشان كده قبل ما تدور على سفير للبراند بتاعك دور الأول على السمات المشتركة عند العملاء بتوعك وبعد كده دور على الشخص اللي شبههم عشان يقدر يؤثر فيهم، نتمنى نكون أفدناكم وربنا يوفق الجميع.