ميزانية التسويق

إزاي بتحدد ميزانية الدعاية والتسويق

فيه أكتر من سؤال جالنا عن موضوع ميزانية الإعلانات والتسويق بس للاسف فيه مفاهيم خاطئة كتير عن ميزانيات الدعاية والتسويق

6 نصائح في استخدام ميزانية دعاية وتسويق إحترافية

أولاً ميزانية أو مصاريف الدعاية والتسويق:

لازم يكون ليها مبلغ ثابت كل شهر زي باقي المصاريف اللي بتكون على الشركة سواء هناك موسم أو لأ ..سواء الدنيا شغاله أو واقفه بل أحيانا لو الشركة فيها أزمه مصروفات أو تعثر بتقدم علي كل البنود لأنها لو وقفت الشغل بيقف والتعثر هايطول إنما مع وجود الدعاية والتسويق ممكن يبقي فيه مبيعات تقدر الشركة من خلالها تقوم بعملية البيع.

 ثانيا مفيش ربط بين ميزانية الدعاية والتسويق والشهرة:

يعني لو أنا عندى منتج مشهور بالتالي اوقف عملية الإعلانات ده مفهوم خاطئ واللي يلاحظ بيبسي وكوكا كولا هيلاقي أنهم اشهر منتجين فى السوق للمياه الغازية وبالرغم من كده بيقوموا بعمل دعاية وتسويق طول العام.

 ثالثا تحليل المبيعات:

لو صرفت كتير على ميزانية الدعاية والتسويق وفي الاخر مش عندك أداة تقولك تحليل نتائج الدعاية والتسويق يبقي انت بترمي فلوس على الفاضي، من أفضل البرامج اللي ممكن تساعدك على تحليل المبيعات هو الـ (CRM) ولو مش متاح ميزانية ممكن تستخدم برنامج إكسل، وتحليل المبيعات لازم يكون يومياً عشان تعرف المبيعات بتم من خلال أي إعلان مثلا لو بتصرف على إعلانات الفيسبوك 5000 جم و بتحصل علي 50 عميل وبتصرف على جوجل 5000 جم و بتحصل على 100 عميل بتبدأ بعد كده تشوف كام عميل اشترى من حملة الفيسبوك وكام عميل اشترى من حملة جوجل وبعد كده تقرر تصرف علي اللي يجي منه عملاء اكثر.

 رابعا أهداف الدعاية والتسويق مش بيع بس:

الهدف من الإعلانات ان الناس تعرف المنتج أو الخدمة سواء تم الشراء أو لا وبالنسبة للعملاء الحاليين عشان تحافظ عليهم وتكون ضامن ولائهم والعميل اللي هيشوف الإعلان مرة ومش هيشتري ممكن ياخد أكشن في المرة الثانية لما الإعلان يظهر ليه.

خامسا التنوع في استخدام الإعلانات:

زمان كان غير متاح عمل اعلانات غير اوفلاين وده كان بيسبب للشركات الصغيرة والمتوسطة عائق فى التسويق بس بعد انتشار وسائل التواصل الاجتماعي بقى قدام الشركات ديه اختيارات كتيرة للتسويق يمكن استغلالها وبالتالي أنت كصاحب بيزنس لازم تجرب كل انواع الاعلانات المختلفة على جميع وسائل التواصل الاجتماعي وتشوف العميل بتاعك هيكون موجود فين وتبدأ تزود من ميزانية الدعاية والتسويق على وسيلة التواصل الاجتماعي التي تناسب البيزنس وأهدافه.

سادساً متى يتم إيقاف ميزانية الدعاية والتسويق:

الحاله الوحيده اللي نوقف فيها هي الإعلانات هي إن يبقي عندنا شغل فوق طاقتنا ووقتها ممكن نقلل الحملة لأقل مستوى أو حتى نوقفها لإعادة ترتيب أوراقنا وتجهيز شغلنا وأحيانا لرفع أسعارنا ونبدأ تاني.

الخلاصة

في كل الأحوال لازم نعرف إن فيه دورة فلوس بتبدأ إنك تدفع فلوس إعلانات يجيلك عميل تبيع له يديلك فلوس تمول بيها العمليات من شراء بضاعة أو تصنيع أو تشغيل وخلافه إيقافك للإعلانات معناها إنك توقف الدورة أو تشتغل بالقصور الذاتي زي كده لو شيلت رجلك من علي بنزين العربية هتفضل تمشي شوية وبعد كده هتقف ....ربنا يوفقكم ويكلل جهودكم وياريت لا ترفع قدمك من على البنزين أبداً.