هل حصل معاك مرة إنك مشيت موظف عندك وبعدين فكرت ترجع تشغله عندك تاني؟ طب هل حصل وكنت طالب موظفين ولقيت ناس كانوا شغالين معاك من فترة باعتين لك السيفيهات بتاعتهم؟ لو محتار ترجعهم ولا لأ، فالبوست ده اعتقد إنه هيساعدك تاخد القرار السليم.

إعادة التوظيف بيعتبر شيء شائع جدا خاصة في الأنشطة الموسمية زي الأنشطة اللي ليها علاقة بالمصايف واللي بيكون فترة رواجها في الصيف والخريف كل سنة وخلاص وبالتالي فأنت كل سنة بتجيب نفس العمالة لو ده متاح قدامك، كمان إعادة التوظيف بيبقى حاصل غالبا في الصناعات اللي القوي العاملة فيها قليلة ومحدودة.

طب في المقابل بقي هل إعادة التوظيف ده مناسب للشركات؟ هل ممكن بعد ما مشيت موظف ترجع تشغله تاني؟ في دراسة قامت بيها شركة البحوث والاستشارات WorkplaceTrends.com بالتعاون مع معهد القوى العاملة بشركة كرونوس في يوليو 2015، واللي قامت ببحوث استقصائية على حوالي 1807 من خبراء ومديري وموظفي الموارد البشرية.

البحوث أظهرت أن ما يقرب من 50% من الخبراء بيقولوا إن شركاتهم كانت عندها تحفظات تجاه تعيين أي موظف ساب الشركة قبل كده حتى لو كان من غير مشاكل، لكن في الوقت الحالي الوضع اختلف وحوالي 75% منهم قال إن شركاتهم بقي عندهم قبول لفكرة إعادة تعيين الموظفين مرة تانية، أما المديرين ففي أكتر من التلتين كانوا موافقين على فكرة إعادة موظفين سابقين، البحث وجد كمان إن حوالي 15% من الموظفين عادوا بالفعل لأماكن عملهم السابق و40% ممكن يفكروا في الرجوع لشغلهم السابق مرة تانية.

والشركات لازم قبل ما تفكر ترجع حد من الموظفين السابقين عشان يشتغل عندها تاني يكون في بالها مجموعة من الاعتبارات:

- الموظف مشي ليه؟ دايما حط في اعتبارك سبب مغادرة الموظف للشركة، هل استقال ولا اترفد؟ أساس عملية إعادة التعيين هو إنك تعرف سبب خروجهم من الأساس.

هل تم إنهاء عقده بسبب مشكلة حصلت (سرقة – رفض تنفيذ التعليمات) ولو ده الحال فلازم تكون حذر جدا في فكرة إنك تعرض عليهم شغل جديد لأنك ساعتها هتعرض نفسك لخطر كبير.

أما لو في حالة إنك كنت انت اللي ممشيه بدون وقوع خطأ منهم، أو كانت استقالتهم بسبب ظروف مروا بيها زي إنهم يكونوا مضطرين يسيبوا الشغل عشان يتفرغوا لرعاية شخص يهمهم أو بسبب بحثهم عن مجال ودور تاني يتعلموه، فاعتقد في الحالة دي إعادة التعيين فكرة مش سيئة.

- هل هو الأفضل للمنصب؟ عملية التعيين والتوظيف غالبا بتاخد وقت طويل في حين إن بعض المديرين بيبقوا محتاجين يعينوا أفراد في أسرع وقت ممكن، وفي اللحظة دي لازم تسأل نفسك سؤال، هل الشخص اللي بتفكر تعيد توظيفه ده أفضل مرشح ممكن يتقدم للوظيفة اللي انت عايزاها ولا هتاخد قرار إعادة تعيينه بس عشان ده الحل الأسرع بالنسبالك؟

- إيه الجديد اللي هيقدمه؟ الواحد لما بيسيب شركة ويروح التانية بيكون عشان يكبر ويتطور، فالموظف اللي بتفكر في تعيينه ده عمل إيه من ساعة ما ساب الشغل؟ وهل الخبرة اللي اكتسبها هتكون مفيدة للشركة ولا لا؟ مصلحة الشركة في أنها تتقدم، متوقفش مكانها أو ترجع لورا، وعشان كده لازم تبقى عارف كويس جدا هل الشخص ده هيقدم أفكار جديدة تطور من الشركة وتقدمها ولا هيرجع يعمل نفس اللي كان بيعمله لا أكتر ولا أقل؟

- إيه هو تأثير إعادة تعيينه على الشركة؟ لازم تكون عارف مدى تأثير الموظف ده على مناخ وثقافة الشركة وهل القيمة اللي بيقدمها بتتناسب مع الشركة ولا لأ، لو إجابة السؤال ده مش واضحة عندك فلازم تاخد وقتك مع الموظف لغاية ما توصل لإجابة قاطعة، لو الموظف ده كان مسبب حريقة بالعربي كده بين زمايله قبل ما يمشي يبقى ليه تجازف وتخلق مصدر توتر وترجعه مرة تانية؟

- الموظف شايف خطوة إعادة تعيينه مرة تانية إزاي؟ ساعات في موظف بيبقى حاسس بعدم التقدير المادي جوه الشركة فبيسيبها ومع أول فرصة بيحاول يرجع عشان يفرض شروطه اللي مكنش قادر يحققها قبل كده، وفي اللي بيحس إن الشركة القديمة دي منطقة أمان له لو في لحظة ساب شغله التاني ومعرفش يلاقي شغل غيره وبما إنه بيبقى عارف الأجواء وطريقة الشغل بيكون من السهل إعادة تعيينه.

بس في النهاية هل خطوة رجوع الموظف ليك دي أفضل فرصة بالنسباله فعلا؟ لو انت حاسس إن شركتك هتكون مجرد خطوة مؤقتة للموظف لغاية ما يلاقي فرصة تانية، دور على غيره!

- أخيرا هل دورت على مرشح للوظيفة جوه شركتك؟ مين تاني جوه الشركة ممكن يكون مؤهل إنه يشتغل الشغلانه اللي انت هتحاول تقدمها لموظف سابق عندك؟ لازم تفكر في الرسالة اللي هتوصل لموظف كان بيشتغل عندك بأقصى ما يستطيع ومنتظر الترقية وفجأة يلاقيك بتديها لموظف كان عندك ومشي، هل هيكمل معاك ولا هيسيبك ويروح لشركته القديمة يمكن ياخد الترقية اللي كان مستنيها هو كمان؟

الحقيقة إن تجربة إعادة توظيف ناس كانوا بيشتغلوا معاك قبل كده ليها سلبيات وإيجابيات، يعني مش بالضروري لما ترجع موظف عندك ده معناه إنه هايبقى ستيف جوبز اللي أنقذ شركة أبل من الفشل وخلاها من أقوي الشركات على مستوى العالم، ولكن بوجود سياسة لإعادة التعيين في الشركة بتراعي الاعتبارات اللي فاتت ويكون هدفها زيادة الإنتاجية وجذب أفضل المواهب للشركة، وتكون بتحدد مين اللائق لإعادة توظيفه مرة تانية ومين لا، فأنت هتكون كسبان مش خسران أكيد.