هنتكلم النهاردة عن العنصر التالت من عوائق البيزنس وهو:

الحاجز الجغرافي

يعتبر الحاجز الجغرافي من الحواجز اللي بتقدر تحدد منها شكل السوق والمنافسة والعائق الجغرافي مقسوم لجزئين

1- الجزء الأول للحاجز الجغرافي يتلخص إن لو شخص معاه رأس مال كبير وقرر إنه يعمل بيزنس معين والبيزنس دة معتمد إعتماد كلي على مادة خام زي مثلاً لو هتفتح شركة بترول في إحدى الدول الافريقية مش من المنطقي إنك تنافس شركة موجودة في الخليج العربي أو روسيا اللي بيعتبروا المادة الخام لكل منتجات البترول..

وبتكون عندهم تكلفة بسيطة لإستخراج البترول وتكلفة بسيطة في نقله لنفس البلد ده غير لو هعمل شركة مثلا في جنوب افريقيا هيكون عندي تكلفة نقل كبيرة من اي بلد منتجة للبترول للبلد اللي هفتح شركة فيها وبالتالي كل التكاليف دي هتتحط على المستهلك عشان اقدر اعوض المصاريف دي كلها.

وفي نفس الوقت لازم اقدم خدمة لا تقل عن المنافس فبالتالي مش هقدر انافس أي شركة موجودة في نفس منطقة المادة الخام غير لو صرفت كتير جداً في البداية فبالتالي الافضل اني اعمل مشروع في نفس منطقة المادة الخام أو قريب منها عشان اقلل تكلفة على نفسي وعلى المستهلك.

2- الجزء التانى للحاجز الجغرافي هو "الموقع الجغرافي" يعني لو مستثمر معاة مبلغ حب انه ينافس هايبر وان فمن الضروري انه يلاقي موقع قريب منه عشان يقدر ينافسه وعشان تلاقي موقع في المكان دة الايام دي ممكن ميلاقيش ولو المكان موجود هيكون سعره اضعاف عن ما صاحب هايبر كان شاري الارض.. فبالتالي التكلفة هتكون كبيرة عليك من البداية عشان تنافس شركة أو محل تجاري اشترى الارض والاساس بتاعة من فترة كبيرة وكانت التكلفة صغيرة بالنسبة لدلوقتي!!

ومن هنا عرفنا ان العائق الجغرافي شيء مهم جداً ولازم اعمل حسابه لو هتنشأ مصنع يفضل إنك تكون جنب المادة الخام اللي هتستخدمها وجنب الايدي العاملة الرخيصة ولو هتبدأ بيزنس جديد حاول تفكر انك تاخد مكان مميز في جديدة أو بعيدة عشان تقدر تشتري المكان بسعر رخيص وتقدر تعمل المشروع اللي بتحلم بيه وبعد فترة من الزمن صعب حد يقدر ينافسنك في نفس مكانك..