‏‏من أكتر المهام الصعبة اللي بيواجهها أي مدير أو مسئول إتش أر هو اختيار موظف جديد كفء، ومناسب للوظيفة المطلوبة، فبنلاقي كتير من المديرين رغم مهارتهم الإدارية وكفاءتهم المهنية بيقعوا في خطأ توظيف شخص غير ملائم للوظيفة المطلوبة، وللأسف ده ما بيتعرفش غير بعد ما يبدأ الموظف الجديد شغله ويفشل في إثبات كفاءته، ويرجع المدير تاني يبدأ العملية كلها من الأول ويقابل مرشحين تاني ويوظف حد تاني وهلم جرا.

وعشان مش دايما أفضل متقدم للوظيفة- من ناحية السي في أو من ناحية تقديره في دراسته الجامعية وغيره- بيكون هو الأنسب للوظيفة، إحنا النهاردة هنقدملكوا روشتة موجزة نعالج بيها النقطة ديه، اتبع النصايح المكتوبة وتأكد إنك بنسبة كبيرة جدا هتختار الموظف المناسب:

* البداية الصحيحة بتكون في صياغة الإعلان عن الوظيفة، حدد في إعلانك المطلوب في الوظيفة بدقة شديدة جدا، عشان تقلل عدد المتقدمين المبالغ فيه وتخلي اختياراتك مركز على كل من يتوافر فيه الشروط المطلوبة.

* الإنترفيو أداة مهمة قوي، فكر كويس وخلي أسئلتك للمرشح توصلك كل المعلومات اللي عايز تعرفها عنه وعن خبراته وشخصيته.

* تجنب تماما الاستعجال، بعد ما تحصر الاختيارات المتاحة قدامك في كام مرشح، خد وقتك وادرس السير الشخصية للمرشحين ونتيجة الإنترفيو بتاعة كل واحد، فالتأني في القرار أفضل من الاختيار الخاطئ.

* مهم جدا تراعي في اختيارك للموظف الجديد لو الوظيفة ليها متطلبات خاصة، زي بنية جسدية قوية لو فيها شيل أحمال تقيلة أو فيها حركة ومشي و مسافات طويلة لو الوظيفة مش مكتبية.. إلخ.

* التفوق الدراسي مهم، بس مش هو المعيار الرئيسي، خده في الاعتبار في حالة لو ليه تأثير على الوظيفة المطلوبة، مثلا لو الوظيفة ليها علاقة بالبحث وكتابة الدراسات.

* الابتكار والإبداع مهم جدا، وتقريبا مافيش نجاح مبهر بيتحقق في أي شغل إلا لو صاحبه مبدع، مهم باختبار بسيط مكتوب أو في الإنترفيو تختبر قدرة المرشح على ابتكار شغل مميز أو حلول لمشاكل العمل المتوقعة.

* في بعض الوظايف بيكون معيار مهم فيها جدا إنك تشوف نماذج شغل للمرشح، عشان تقدر تقيم مدى كفاءته ومهارته، زي مثلا وظيفة الكتابة أو الترجمة.

* الثقة بالنفس.. صفة مهمة قوي لازم تتوافر في الموظف أيا كانت الوظيفة اللي هيشتغلها، عشان يبدع ويبتكر ويعرض شغله كويس لازم يكون المرشح ده شخص عنده ثقة بنفسه.

* مهم قوي لو إنت بتشكل فريق عمل جديد تراعي إنك تختار أفراد الفريق يكملوا بعض، يعني يبقى فيه تنوع في المهارات والخبرات السابقة والصفات الشخصية كمان.