بالإشارة لموضوع مراحل تكوين فريق العمل إللى هما 4 مراحل تعارف ثم صراع ثم وضع للقواعد ثم أداء وتألق حابب أقول شوية ملحوظات :-

أولًا أى حد فينا هو عضو فى فريق عمل وفى نفس الوقت قائد لفريق عمل وده مهم إننا نفهمه ونحاول نتفاعل صح مع أى فريق إحنا جزء منه سواء إحنا فى القيادة أو كعضو بما يتناسب مع المرحلة إللى فيها الفريق .

ثانيًا محدش فينا تقريبًا بيختار فريقه حتى لما الواحد بيكون مدير لفريق ممكن الشركة تكون هى اللى بتختار وحتى لما إحنا بنختار فمش دايمًا إختياراتنا بتكون ممتازة وعلشان كده لازم نحط فى دماغنا إن لازم يبقى لينا تأثير إيجابى على الفرق اللى بنكون فيها سواء كأعضاء أو كمديرين .

ثالثًا مهم جدًا إننا نساهم فى الانتقال من مرحلة لمرحلة بدون تأثر نفسى كبير وده دور مدير الفريق وكل أعضاؤه يعنى نبقى فاهمين إن الخناقات اللى بتحصل علشان إحنا كلنا جايين من بيئات وثقافات مختلفة وكلنا عايزين ننجح فبيبقى فيه شد وجذب فى الشغل لحد ما ناخد على بعض ونفهم شغل بعض فبلاش كل شوية ندخل المشاعر فى الموضوع .

رابعًا فيه حاجة إسمها تداخل مراحل يعنى ممكن نخش على مرحلة الصراع ولسه فيه ناس بتتعرف على بعض ودى حاجة عادية .

خامسًا طبيعى إن فيه عضو من أعضاء الفريق بيقع منا وده مش عيب فيه ولا فى الفريق ده عدم توافق عادى فمفيش داعى نبص للموضوع على إنه أزمة.

سادسًا كل مرحلة ملهاش فترة زمنية محددة ولكن بتنتهى بانتهاء أهدافها يعنى مفيش كتالوج بيقول إن المرحلة الأولى بتقعد شهر مثلًا لأ طبعًا وكل مدير وشطارته إنه ينقل الفريق أو أى عضو جديد بين المراحل المختلفة بسرعة علشان يتأقلم ويضيف للفريق .

وربنا يوفقنا جميعًا سواء أعضاء فى فريق أو مديرين