920033973
16342
article

مشاكل إدارة الموارد البشرية

November 25, 2019    

رسالة من موظف مجهول: عزيزي الـ HR أنا بكرهك

بعد السلام والتحية ..
انت عارف انا بكرهك ليه؟ أو بمعنى أدق ليه مش بثق فيك؟

• لأني دايمًا شايف أنك واخد جانب الشركة وبتدور على مصلحة الشركة، أكتر ما بتدور على مصلحة الموظفين.

• لأنك دايمًا مش موجود، وبدل ما تتواصل معايا كموظف وتشوف احتياجاتي ومشاكلي، قاعد في مكتبك بعيد ومش بشوفك ابداً.

• لأن أوقات كتير انا وزمايلي بنحس أنك معندكش خبرة كافية للتعامل مع اختلافات وخلافات الموظفين، ولو جينالك في مشكلة مع زمايلنا أو مديرنا بتفضل زي ما هيا ومش بتتحل أو بتاخد شهور عقبال ما تتحل.

• لأنك بتركز على الموضوعات الأقل أهمية وبتسيب الموضوعات المهمة والمؤثرة، يعني بتركز أوي على الالتزام بتطبيق سياسات العمل وفي نفس الوقت سايب مواضيع أهم زي تحفيز الموظفين وتقديرهم أو ورفع معنوياتهم المنخفضة أو مساعدتهم على التكيف في بيئة العمل الجديدة.

• لأنك أوقات كتير بيكون عندك مشكلة في رؤية "الجانب الإنساني" للموظف، زي لما بترفض الأجازة المرضي لأن الموظف مجبش ما يثبت المرض، أو لما ترفض زيادة المرتب في ظل وجود تغير في الأسعار وغلاء في المعيشة.

وانا مكتبتش الرسالة ديه عشان أزعلك أو ألومك، انا بس حبيت ألفت نظرك لحاجات يمكن تكون مش واخد بالك منها، حاجات مضيقاني وشايف أنها بتضايق كل الموظفين، وقولت أقولك عليها يمكن تاخد خطوة وتحاول تصلحها، وتخليني أرجع أثق فيك من جديد.

ومن وجهة نظري كموظف شايف أنك ممكن تصلح المشاكل دي بشوية خطوات زي:
اولاً: أنك تلعب دور الوسيط ما بين الإدارة والموظفين بشكل موضوعي وشفاف، بحيث توصل رغبات الموظفين للإدارة بكل شفافية، وفي نفس الوقت لو الإدارة قررت أي قرار انت شايف أنه هيأثر على الموظفين وممكن يضرهم زي تخفيض الراتب أو تخفيض الامتيازات، مينفعش تقف ساكت وتنفذ الاوامر وخلاص لازم تحاول توصل للإدارة التأثير السلبي للقرارات دي على الموظفين وتحاول تدافع عنهم لحد ما توصل لحلول وسط ما بين مصلحة الشركة ومصلحة الموظف، وده لأنك بالنسبة للموظفين صوتهم وممثلهم عند الإدارة.

ثانياً: أنك تقدر الموظفين وتعترف بمجهودهم في تحقيق نجاح الشركة سواء من خلال شكرهم أو تكريمهم ومنحهم زيادة في المرتب، وكل ده هيحسن صورتك في عين الموظفين ويخليهم يشعروا بمزيد من الانتماء لمكان العمل.

ثالثاً: أنك تقضي وقت أكبر مع الموظفين وتتعرف عليهم، وتعرف احتياجاتهم، وتشوف إزاي ممكن تساعدهم يحسنوا من أدائهم في العمل سواء من خلال أنك تقدم لهم البرامج التدريبية اللي هما محتاجينها أو تقدم لهم مكافأت أو توفر لهم بيئة عمل أفضل.

رابعاً: أنك تشارك مع الموظفين جميع الحقائق والتقارير، يعني لو في خصم غير مبرر أو في إجازة اتلغت قولهم الأسباب الحقيقية، لأني قرأت مقال في Harvard Business Review بيقول أن مشاركة الموظفين بالمعلومات، زي التقارير المالية وتوقعات الشركات والملاحظات من اجتماعات مجلس الإدارة ومقاييس الأداء الرئيسية، بيخلي الموظفين يشعروا بوجود صدق وشفافية في التعامل وبالتالي بيكونوا شايفين أن في أسباب منطقية لرفض مطالبهم.

خامساً: أنك تتعامل مع الجميع بنفس الطريقة بدون استثناء، يعني الموظف زي المدير، الجميع مش مسموح لهم التأخير أو الغياب أو بكسر أي قواعد، وزي ما بتحل مشكلة المدير بسرعة لازم تحل كمان مشكلة الموظف بنفس السرعة.

سادساً: أن يكون في شفافية أكبر في موضوع المرتبات والفروق ما بين الموظفين بمعنى أن مفيش موظف ياخد 10 آلاف وموظف تاني ياخد 5 طالما مفيش أي فروق ما بينهم من حيث المهارات أو الأداء، ومش لمجرد أن موظف عارف يقدر قيمته صح وموظف تاني لأ يبقى تفرق في المرتب.

سابعاً: أنك تكون متاح لاستقبال الموظفين في أي وقت، متاح لسماع مشاكلهم والتعاطف معاهم، بالإضافة للإجابة على جميع تساؤلاتهم بشكل صريح وواضح.

واخيراً عايز أقول نصيحة ياريت توصلها للمدير أو صاحب الشركة، مينفعش تعين موظفين الـ HR بشكل عشوائي يعني مينفعش أنك تجيب موظفين كانوا بيشتغلوا في أي وظيفة تانية وتشغلهم HR لأن ليهم دور كبير في نجاح الشركة وراحة الموظفين، ودورهم أكبر بكتير من مجرد تخليص أوراق أو غياب وحضور وخصومات، عشان كده لازم تعين موظفين عندهم خلفية علمية وخبرة وعندهم مهارات تواصل جيدة وعارفين هما دورهم أيه بالظبط عشان يتواصلوا مع الموظفين بأفضل شكل ممكن.
التوقيع: موظف مجهول

خصم 50% عند الإشتراك في أكاديمية إعمل بيزنس


مقالات مشابهة

المزيد
معلومات عن تدريب اليقظة التامة
معلومات عن تدريب اليقظة التامة

"اليقظة التامة".. طرق جديدة لتحقق أهدافك في العام

الأكثر قراءة

المزيد
ادارة الصراع بين فريق العمل - ج1
ادارة الصراع بين فريق العمل - ج1

إدارة الصراع بين فريق العمل داخل الشركة .... مفيش حد

تعرف على أساليب وطرق استقطاب الكفاءات البشرية لشركتك
تعرف على أساليب وطرق استقطاب الكفاءات البشرية لشركتك

"الشخص المناسب في المكان المناسب" مبدأ يدور حوله عملية

ادارة الصراع بين فريق العمل - ج2
ادارة الصراع بين فريق العمل - ج2

اتكلمنا فى حلقة قبل كده عن ضرورة وجود منافسة وأحيانًا

دليلك المختصر لفهم أهمية تدريب وتطوير الموظفين 
دليلك المختصر لفهم أهمية تدريب وتطوير الموظفين 

في ظل المنافسة الشرسة بين الأسواق، أصبح الحصول على

فريق الأحلام - ج2
فريق الأحلام - ج2

بالإشارة لموضوع مراحل تكوين فريق العمل إللى هما 4

مراحل تكوين فريق العمل ج1
مراحل تكوين فريق العمل ج1

أى فريق عمل وهو بيتكون أيا كان حجمه أو طبيعته بيمر ب 4

فريق الأحلام - ج1
فريق الأحلام - ج1

أى فريق عمل وهو بيتكون أيا كان حجمه أو طبيعته بيمر ب 4